Дзæуджыхъæуы æрныхас кодтой бинонты хсæн ахастдзинæдтыл æмæ адæмты иудзинадыл. Фембæлд саразыныл бакуыста республикæйы пысылмæтты управлени. Æмбырдмæ æрбахуыдтой Цæгат Ирыстоны, Цæгат Кавказы федералон зылды æмæ Хъалмыхъы республикæйы дины организациты минæвæртты. Уыдон бæстон æрлæууыдысты, бинонты институт кæй хонынц, уыцы хæзнатыл, дины алы хуызты тæваг бинонты ахастдзинæдтыл куыд фæбæрæг вæййы, ууыл, стæй ныгуылæн бæстæтæ цы мæнг миниуджытæ парахат кæнынц дунейы бæстæты, уыцы фæзындтыл.