Цæгат Ирыстоны скъоладзаутæ равдыстой сæ арæхстдзинад ирон чъиритæ фыцынæй, æнæпилотон тæхæн аппараттимæ архайынæй, электрон фæрæзтæ монтаж кæнынæй. Чемпионат «Аланийы æвзонг мастертæ» сæмбырд кодта 226 архайæджы республикæйы 101 скъолайæ. Ерыс кодтой 15 компетенцийы. Ацы аз фыццаг хатт программæмæ бахастой ног дисциплинæ – пъæлицæйаг хъуыддаг. Бæлвырддæр радзурдзæн Хъайтмазты Дзерассæ. Хъыбызты Кристинæйыл 10 азы йедтæмæ нæма цæуы, фæлæ ныридæгæн дæсныйæ фыцы ирон чъиритæ. Фæлмæн хыссæимæ сывæллон арæхстджынæй архайы. Йæ фыццаг чъири сцæттæ кодта 2 азы размæ – йæ мадимæ æмæ йын уæдæй фæстæмæ цæлгæнæн сси чысыл æрмадз. Фарон Кристинæ фæуæлахиз чемпионат «Аланийы æвзонг мастерты» æмæ та ныр фæнд кæны ахæм хатдзæг равдисын. Куыд зæгъы, афтæмæй зоны хæрзад чъири сцæттæ кæныны сусæгдзинад. «Ирон чъиритæ фыцыны» компетенцийы архайы 15 скъоладзауы. Сæ куыстмæ цæст дарынц 6 эксперты, алкæмæндæр йæхи хæс: иутæ бæлвырд кæнынц куысты бынаты сыгъдæгдзинад, иннæтæ аргъ кæнынц чъирийы адæн æмæ йæ фынгыл куыд æрæвæрдтой, уымæн. Ам ахсджиаг у алы лыстæг хъуыддаг дæр. Аграрон-технологон колледжы уыцы иу рæстæг цæуынц 3 компетенцимæ гæсгæ ерыстæ. Уыдонæй иу у æнæпилотон системæтимæ архайын. Скъоладзаутæ хизынц цæлхдурты сæрты, æвдисынц бæлвырддзинад æмæ тагъдад. Электрон фæрæзтæ монтаж кæнын æнцон хæслæвæрд нæу, уæлдайдæр та райдиан скъолайы ахуырдзаутæн. Фæлæ ацы архайджытæ ныфсджынæй сыгъдæг кæнынц телтæ, æвæрынц хæтæлтæ æмæ æххæст кæнынц æндæр ахсджиаг къæпхæнтæ. æмæ æрмæст бæлвырд куысты фæстæ ссудзы лампочкæ. Алы архайæджы фарсмæ дæр зондамонæг, аграрон колледжы студент. Ацы аз чемпионат «Аланийы æвзонг мастертæ» баиу кодта 226 ахуырдзауы республикæйы 101 скъолайæ. Ерыстæ цæуынц 15 компетенцимæ гæсгæ, сæ хыгъды ис ног дæр – пъæлицæйаг хъуыддаг. Мадзал аразджытæ куыд зæгъынц, афтæмæй сæ зæрдæ дарынц, ацы фæзтæ архайджытæн кæй суыдзысты фыццаг къахдзæф фидæны дæсныйæдтæм.