Уæрæсейы наукæты академийы Дзæуджыхъæуы наукон центры Геофизикон институты арæзт æрцыд 10-æм æппæтадæмон конференци. Ацы аз йæ темæ баст у æрдзон æмæ техногенон тæссагдзинæдтимæ. Мадзал баиу кодта ахуыргæндты, инженерты, проекттæ аразджыты æмæ æндæр специалистты Уæрæсейы алы регионтæй. Онлайн хуызы фембæлды архайдтой фæсарæйнаг бæстæты æмкусджытæ дæр. Цалдæр боны дæргъы конференцийы архайджытæ дзурдзысты сæхи иртæстыты æмæ парктикон фæлтæрддзинады тыххæй. Уымæй дарддæр æрныхас кæндзысты тæссаг æрдзон æмæ техногенон процесстæм мониторинджы актуалон фарстатыл. Уæлдай æргом нысан кæнынц аздахын зæххæнкъуыстыты æмæ æндæр æрдзон фæзындтыты анализмæ. æрдзурдзысты ма территоритæ æмæ инфраструктурæ хъахъхъæныныл. Специалисттæ куыд зæгъынц, афтæмæй ацы къабаз ахсджиаг у, йæ геологон æмæ геодинамикон уавæртæ уæззау кæмæн сты, уыцы цæгаткавказаг регионæн. Зæгъдзыстæм ма уый дæр, æмæ конференци сбастой Дзæуджыхъæуы наукон центры Геофизикон институты 30 азы бонимæ. Йæ кусджытæ хорзæхгонд æрцыдысты алы ведомствоты кады гæххæттытæй æмæ арфæйы фыстæджытæй.