Сывæллæтты музыкалон театр "Синяя птица" Мæздæджы цæрджытæн бацæттæ кодта мюзиклы премьерæ "Если звезды падают…". Спектаклы бындуры – зындгонд советон мультфильмты сюжеттæ. Сывæллæттæ канд уарзон хъайтартыл нæ сæмбæлдысты, фæлæ ма сахуыр кодтой зындгонд зарджытæ дæр. Залы тыхджын къухæмдзæгъд дзурæг уыд ууыл, æмæ спектакль се ппæты зæрдæмæ дæр кæй фæцыд. Актеры дæсныйадыл сывæллæтты ахуыр кæнынц Глинкæйы номыл сывæллæтты музыкалон скъолайы театралон секцийы. Разамынд ын дæтты Ирина Джараян. Музыкалон театр «Синяя птица» ныридæгæн рауагъта курдиатджын фæсивæды цалдæр фæлтæры. Сфæлдыстадон ахуыртæ сын фадат радтой сæ курдиат раргом кæнынæн, æмæ фидæны дæсныйад равзарынæн.