Чырыстон диныл хæст адæм сбæрæг кодтой стыр къниаз Владимиры номарæн бон. Нымад у Уырысыл дзуæрттæ бафтауыны боныл. 988-æм азы къниаз Владимир æмæ йе фсæддон дружинæ сæхиуыл саргъуыдтой. Афтæмæй Уырысы парахат кæнын райдыдта чырыстон дин, куыд паддзахадон, афтæ. Æппæт аргъуанты ацыдысты Хуыцауы номыл литургиятæ. Дзæуджыхъæуы къниаз Владимиры номыл аргъуаны службæ скодта Дзæуджыхъæуккаг æмæ Алайнаг алчер Герасим. Уымæй дарддæр аргъуаны æрцыд историон цау. Кадджынæй сæмбæлдысты сыгъдæг Стыр ус-паддзах (Алайнаг) Мария Ясыняйы буары хæйттыл. Уыцы хæзна Ирыстонæн балæвар кодта Владимиры æмæ Суздалы митрополит Никандр. Рагон уырыссаг азфыстытæй бæрæг у, Мария Ясыняйæн алайнаг уидæгтæ кæй ис, уый. Куы смой кодта, уæд ын райгуырд 12 сывæллоны. Уыдонæй 6 нымад æрцыдысты сыгъдæг удтыл. Мария Ясыня у ирд дæнцæг уырыссаг æмæ ирон адæмы иудзинадæн. Кадджын мадзалы фæстæ хуыцауы номыл арæзт æрцыд литургия.