«Адæмты иудзинад фашизмимæ тохы». Ахæм сæргондимæ æппæтадæмон конференци уыд национ наукон библиотекæйы. Арæзт æрцыд патриотон акци «Я вернулся, мама...» æххæстгæнгæйæ. Архайдтой дзы Цæгат Кавказы федералон зылды субъектты минæвæрттæ. Патриотон акцийы автор у Цæцæны республикæйы зындгонд æхсæнадон архайæг Сайпуддин Гучигов.  Мадзалæн бындур æвæрд æрцыд 2020-æм азы. Ахæссыд 15 бæстæйыл æмæ баиу кодта 50 мин архайæгæй фылдæры. Акцимæ гæсгæ Цæгат Кавказы федералон зылды территорийы æфсымæрон ингæнты цы хæстонтæ ныгæд сты, уыдон бæрæггонд цæуынц. Афтæмæй бантыст сбæлвырд кæнын 40 бинонтæй фылдæры хæстæджыты. Сæ хыгъды 2 бинонтæ Цæгат Ирыстонæй дæр. Дзæуджыхъæуы конференци бацæттæ кæнынæн баххуыс кодта хæрзаудæн фонд «Рука помощи».