Йæ цардæй ахицæн зындгонд ахуыргонд æмæ педагог Тахъазты Валерий. 1959-æм азы райгуырд Лескены. 1983-æм азы каст фæци Ленинграды паддзахадон университеты журналистикæйы факультет. Бахъахъхъæдта докторы диссертаци. Разамынд лæвæрдта ЦИПУ-йы ирон филологийы æмæ журналистикæйы факультетæн. Йе вæрæн бахаста университеты журналистикæйы факультет байгом кæныны хъуыддагмæ. Куыста Санкт-Петербурджы уæлдæр ахуыргæнæндæтты. Фæстаг рæстæг уыди Адæмты хæлардзинады уæрæсейаг университеты профессор. Йæ хъæппæрисæй дзы байгом, Малиты Георгийы ном чи хæссы, ахæм аудитори. Тахъазты Валерий Уæрæсейы нымад уыди журналистикæйы теори æмæ историйы раззагдæр специалисттæй иуыл,  80 наукон куыстæй фылдæры автор. Ахуыргонд уыд æрдзон наукæты уæрæсейаг академийы уæнг, Уæрæсейы уæлдæр профессионалон ахуырады кадджын кусæг æмæ Уæрæсейы журналистты Цæдисы уæнг. Тахъазты Валерийæн фæстаг кадгæнæн мадзæлттæ æмæ саударæн митинг ацæудзысты 9-æм апрелы Дзæуджыхъæуы, Весеннийы уынджы, ныгæд та æрцæудзæн йæ райгуырæн хъæу, Лескены.