Уæрæсейы Президенты æххæстбарджын минæвар Цæгат Кавказы федералон зылды Юрий Чайка кусæг балцы уыд Дзæуджыхъæуы. Боны фæткмæ гæсгæ фембæлд республикæйы сæргълæууæг Сергей Меняйлоимæ. æрныхас кодтой субъекты социалон-экономикон рæзты фарстатыл. Фыццаг кварталы хатдзæгтæм гæсгæ, нæ регионы бæрæггæнæнтæ банымайæн ис хорзыл. Промышленнон куыстады индекс январæй мартъийы онг уыд 123 æнæхъæны æмæ 9 дæсæм хайы проценты. Республикæйы конд товарты бæрц сырæзт 11 % æмæ сси 17 миллиард сомæй фылдæр. Экономикæмæ æмæ социалон къабазмæ инвестицитæ дæр зынгæ фæфылдæр сты. Президенты æххæстбарджын минæвар Юрий Чайка ма арфæйы фыстæджытæ радта, Цæгат Ирыстоны æхсæнадон-политикон, стæй социалон-экономикон рæзтмæ æвæрæн чи бахаста, уыцы æнтыстджын кусджытæн. Кадджын мадзалы архайдта Сергей Меняйло. Хæрзиуджыты аккаг систы медицинон кусджытæ, заводы фæллойгæнджытæ, алыхуызон куыстуæтты специалисттæ.