Сергей Образцовы номыл куклаты æппæтадæмон скъолайæн Дзæуджыхъæуы йæ куыст кæронмæ æрхæццæ. Ахæм мадзал нæ республикæйы цыди фыццаг хатт, æмæ дисы бафтыдта куыд профессионалты, афтæ аивадуарзджыты дæр. Уæвгæ та проект раздæр æххæст кодтой æрмæстдæр Мæскуыйы. Царды йæ рауагътой культурон хъæппæристы президентон фонды, федералон æмæ регионалон культурæйы министрадты æххуысæй. Уæрæсейы алы регионтæй 42 архайæгæн æртæ къуырийы дæргъы цыдысты ахуыртæ. Уый фæстæ та аивадуарзджыты размæ рахастой æртæ спектаклы: "Царь Эдип", "Макбет" æмæ "Ковер Насреддина". Скъолайы архайджытæ æххæстæй банкъардой куклаты дуне. Кæд æмæ сæ алкæмæ дæр фæлтæрддзинад уыди, уæддæр сæхицæн райстой бирæ ногдзинæдтæ. Цыбыр æмгъуыдмæ кæрæдзиимæ фесты æнгомдæр. Кукольникты дыккаг скъолайы куыст сæхгæдтой кадджын мадзалæй. Йæ архайджытæн арфæтæ ракæнынмæ æрбацыдысты Парламенты сæрдар Тускъаты Таймураз, культурæйы министры фыццаг хæдивæг Рæмонты Маринæ, стæй театр "Саби"-йы аивадон разамонæг Гæлæуты Аслæнбег. æппæтадæмон скъолайы куысты рæстæг цы спектакльтæ сæвæрдтой, уыдон бацæудзысты «Саби»-йы репертуармæ æмæ сæ сценæмæ рахæсдзысты ног сезоны. Уый та нысан кæны уый, æмæ Цæгат Ирыстоны æвзонг аивадуарзджытæм æнхъæлмæ кæй кæсынц цымыдисаг равдыстытæ.