Цæгат Ирыстоны Национ музейы колоннæты залы байгом, Театралон аивады паддзахадон институты студенткæ Тедеты Елизаветæйы куыстыты равдыст «Рагфыдæлты хъæлæс Кавказы зæрдæ"-йы. Экспозицимæ бахастой нывкæнынады æмæ графикæйы куыстытæ, аивадон инсталляцитæ. Баст сты Ирыстоны историимæ æмæ æгъдæуттимæ. Равдыстмæ хуынд æрцыдысты культурæйы æмæ аивады архайджытæ, дзыллон информацийы фæрæзты минæвæрттæ, блогертæ, стæй нывгæнæджы æмкусджытæ æмæ хæстæджытæ. Æрыгон авторы сфæлдыстадон проект дзурæг у нæ рагфыдæлты хъæздыг культурон æмæ историон хæзнатыл. Уыимæ - нырыккон цæстæнгасы æмæ театралон æвзаджы уылты. Тедеты Елизаветæ йæ куыстыты баиу кодта арф национ хъуыдытæ, Нарты кадджыты сурæттæ, Кавказы æрдзы æмæ театралон цæстæнгас, драматизм, пластикæ. Экспозици схонæн ис рæстæджы диалогæй. Рагфыдæлты хъæлæс авторы куыстыты азæлыд удæгасы хуызæн. Уый та æрыгон фæлтæрæн æххуыс кæны се ргом нæ уидæгтæм аздахынæн, цæмæй нырыккон ивгæ дунейы сæйраг хъуыддæгтæ сæфт ма уой, уый тыххæй.