"Дигорайы горæты истори". Ахæм сæргондимæ чиныджы презентаци арæзт æрцыд Национ наукон библиотекæйы. Рауагъды бындуры сты, ивгъуыд æнусы 60-йæм азты историкты къухфыстытæ. Чиныгыл куыстой 3 азы онг. Уыцы мгъуыдмæ сæмбырд кодтой архивон хуызистытæ, комментаритæ æмæ уæлæмхасæн æрмæджытæ. Уымæй дарддæр чиныгмæ бахастой, Дигорайæ рацæуæг зындгонд цæрджыты тыххæй уацтæ. Уæвгæ та æмбырдгонды бакæсæн ис егъау историон мысинæгтæ. Райдай, Дигорайæн бындур æвæрд куы рцыд, уæдæй, æмæ фæуы, 20-æм æнусы 60-йæм азты онг хъуыстгонд цаутæй. Куыд зонут, афтæмæй Дигора раздæр хуынди Чырыстон хъæу. Бындур ын сæвæрдтой 1852-æм азы. Чиныджы стыр æргом аздæхтой ацы цæрæн бынаты æхсæнадон-политикон цардмæ, револицийы рæстæджы цаутæм, мидхæсты æмæ Фыдыбæстæйы Стыр хæсты азтæм. Презентацимæ хуынд æрцыдысты культурæйы архайджытæ, Дигорайы цæрджытæ, студенттæ æмæ æхсæнадон архайджытæ.