Ацы аз Дыгуры районы скъола каст фесты  11-æм кълæсты 92 рауагъдоны. Уыдонæй 29 адæймаджы райстой сызгъæрин æмæ æвзист майдантæ. Скъола иттæг хорз бæрæггæнæнтимæ каст чи фæцис, уыдонæн кад кодтой Дыгуры районы администрацийы. Сæргълæууæджы хæстæ рæстæгмæ æххæстгæнæг Хохойты Валерий куыд загъта, афтæмæй ацы зондджын æмæ курдиатджын лæппутæй æмæ чызджытæй сæрбæрзонд канд сæ ныййарджытæ æмæ ахуыргæнджытæ не сты, фæлæ районы æппæт цæрджытæ дæр. Йæ зæрдæ сын загъта стыр æнтыстдзинæдтæ, цы профессионалон фæндаг равзарой, уым. Рауагъдонтæн радтой майдантæ, аттестаттæ æмæ районы разамынды номæй зæрдылдарæн лæвæрттæ. Фæсивæдæн зæрдиаг арфæтæ ракодта Дыгуры районы ахуырады управленийы хицау Цæголты Нателлæ. Куыд радзырдта, афтæмæй районы æппæт скъолатæ дæттынц хæрзхъæд ахуырад. Уый та фадат дæтты нæ бæстæйы хуыздæр уæлдæр ахуыргæнæндæттæм бацæуынæн. Рауагъдонтæ æмæ ныййарджытæ бузныджы ныхæстæ загътой æппæт ахуыргæнджыты номыл дæр.