Цæгат Ирыстоны сбæрæг кодтой физкультурникы Бон. Дзæуджыхъæуы Доны станцæйы байгом кодтой 20 тематикон фæзы. Ирхæфсæн программæйы уыдысты чемпионимæ разминкæ, армрестлингæй, мас-рестлингæй, шахмæттæй, дартсæй æмæ командон хъæзтытæй ерыстæ. Бацæттæ ма кодтой сывæллæттæн эстафетæтæ æмæ дугъ. Уымæй дарддæр Доны станцæйы фенæн уыд хæцæнгарзы хуызты равдыст, стæй ма быдырон цæлгæнæн. Спортивон бæрæгбоны архайдтой горæты цæрджытæ, зындгонд спортсментæ, республикæйы разамынды минæвæрттæ æмæ сæрмагонд æфсæддон операцийы архайджытæ. Уæлахиздзауты æмæ призерты схорзæхджын кодтой дипломтæй æмæ майдантæй. Мадзал саразджытæ сты Дзæуджыхъæуы администраци, республикæйы спорты министрад, "Фыдыбæстæ хъахъхъæнджыты Фонды филиал æмæ 58-æм æфсад. æрвылазон ирхæфсæн мадзал арæзт æрцыд, паддзахадон программæ "Уæрæсейы спорт" æххæст кæнгæйæ.