Цæгат Ирыстоны цæуы 13-æм æппæтадæмон наукон-практикон форум «ФАТ-АГРО». Уый у агропромышленнон комплексы сæйрагдæр цаутæй иу. Æрвылаз баиу кæны ацы къабазы минæвæртты, хицауады уæнгты æмæ амалхъом адæмы. Ацы аз нæ республикæмæ ссыдысты уазджытæ Уæрæсейы 21 регионæй, стæй Сомихæй, Кыргызстанæй, Гуырдзыйæ æмæ Китайæ. Сæйраг темæ - картофы мыггæгтæ зайын кæныны хъуыддаджы нырыккон технологитæй пайда кæнын. Форум цæуы 2 боны. Йæ программæйы сты фембæлдтытæ, картофы уæрæсейаг мыггæгты дегустаци. Абон форумы архайджытæ бабæрæг кæндзысты Цæгат Кавказы селекцион мыггæгты центр «ФАТ-АГРО» æмæ æндæр куыстадон фæзтæ. Мадзал саразджытæ куыд зæгъынц, афтæмæй форумы фæлгæты рахæссынц практикон уынаффæтæ, агропромышленнон комплексы рæзты фæдыл. Уымæй дарддæр специалисттæ бафтауынц сæ фæлтæрддзинадыл. Афтæмæй та стыр куыст цæуы нæ бæстæйы хойраджы æдасдзинад фæахадгæдæр кæныныл.