Цæгат Ирыстонæй 7 проекты систы «Фыццæгты змæлд»-ы грантон конкурсы уæлахиздзаутæ. Царды сæ рауадзынæн радих кæндзысты 46 милуан сомы бæрц. Уый тыххæй фехъусын кодта республикæйы сæргълæууæг Сергей Меняйло. Хуыздæрты хыгъды – проект «ТехноСтарт» Мæздæджы районы. Уый фæсивæдæн баххуыс кæндзæн базонгæ уæвын робототехникæимæ, программæтæ аразынимæ æмæ 3Д-моделированиимæ. Ноджыдæр ма иу хъæппæрис – æфсæддон-патриотон мадзæлтты комплекс «Фыдыбæстæйы уарт». Баиу кодта ахуырадон программæтæ, экскурситæ æмæ практикон ахуыртæ. Цæгат Ирыстоны базарадон-экономикон колледжы сараздзæн фестиваль «Æнусты дæргъы иудзинад». Баст у нæ бæстæйы историимæ, культурæйы алывæрсыгдзинадимæ æмæ фæлтæрты бастдзинадимæ. Уый у проекты иу хай. Алкæцыдæр сæ рæзгæ фæлтæрæн дæтты ахуырадæн, сфæлдыстадæн æмæ хи хъæппæристæ æххæст кæнынæн гæнæнтæ, загъта Сергей Меняйло.